A sala Moret Art Espacio (A Coruña) presenta do 16 de abril ao 28 de maio unha exposición de pintura que reúne os dous últimos anos de traballo do pintor arousán Miguel Piñeiro, unha aproximación artística honesta e enriquecedora ao mundo do autismo, un dos trastornos do desenvolvemento máis complexos.

Alicia, unha nena de catro anos que padece un trastorno do espectro autista, é a protagonista da exposición 'A vida en imaxes. Alicia no País das Marabillas', na que Miguel Piñeiro intenta penetrarse, a través dos ollos da pequena, noutras realidades posibles, nas que símbolos e palabras deixan de ir da man para crear universos diferentes nos, quizais, só sexa posible penetrarse desde a imaxinación e a creación artística.

Metáforas visuais cargadas de significado, unhas máis simples e outras radicalmente intricadas, permiten desenvolver a trama desta mostra na que o prestixioso artista plasma a súa persoal visión de como pode percibir a contorna unha persoa que padece un trastorno deste tipo.

Piñeiro explora no esforzadísimo, case obsesivo traballo destes dous anos distintos xéneros pictóricos, e penétrase con mestría en territorios e técnicas plásticas que ata agora non utilizaba, como son a escultura ou a estampa, entre outros.

Independentemente da técnica escollida polo artista para desenvolver cada unha das pezas, o uso dunha linguaxe común, e o seu persoal xeito de expor as composicións, exercen como elemento integrador deste proxecto único.

"Por primeira vez na traxectoria do artista, o mundo dos obxectos perde protagonismo fronte ao das persoas mostrándonos unha faceta moito máis persoal e íntima", conta Nuria Blanco. "Unha mostra redonda na que Miguel explora distintos xéneros, e penétrase con mestría en territorios e técnicas que non utilizaba ata agora como son a escultura e a estampa".

A exposición comeza cunha gran porta que invita ao espectador a penetrarse no País das Marabillas de Alicia, un universo irreal que o artista consegue reproducir grazas a unha técnica asombrosa, dun preciosismo e un detalle que colocan a Miguel Piñeiro entre os mellores representantes do novo hiperrealismo español.

Destaca na traxectoria do mozo Miguel Piñeiro (Vilagarcía de Arousa, 1977) a súa presenza nalgunhas das mellores salas de exposicións nacionais e internacionais -como a Fernado Pradilla - e participou xa nas feiras máis prestixiosas de arte contemporánea. O traballo de Piñeiro foi galardoado en numerosas ocasións por importantes entidades, e resultou primeiro finalista do premio Vespa-Adidas na edición de 2009.

Nas instalacións de Moret Art eEspacio celebraranse actividades paralelas relacionadas con esta exposición e co sindrome do espectro autista, tanto destinadas ao público infantil como para adultos.